Magudin zabe : Amurka ta sanya takunkumin hana biza ga wasu ‘yan Najeriya

Gwamnatin Amurka ta ce ta sanya takunkumin hana biza ga wasu mutane sakamakon aikata magudi a lokacin zaben jihohin Kogi da Bayelsa a Najeriya.

Hakan na cikin wata sanarwa mai dauke da sa hannun sakataren harkokin wajen Amurka, Mike Pompeo.

Mista Pompeo, ya ce za a dauki irin wannan mataki a kan duk wanda aka samu da aikata magudi a zabukan jihohin Edo da Ondo da za a yi a watan Satumba da kuma Oktoba.

Gwamnatin Amurka ta ce duk da laifin da mutanen suka aikata, amma an nade hannu an zuba musu ido, ba tare da an dauki mataki a kan su ba.