Majalisar dokokin Kano ta gayyaci Muhuyi Magaji da ya bayyana a gabanta

Majalisar dokokin Kano ta gayyaci dakataccen shugaban hukumar karbar korafi da yaki da cin hanci da rashawa ta Jihar Kano Barista Muhuyi Magaji Rimin Gado, domin fuskantar bincike kan korafin da akanta janar na Jihar ya shigar gabanta.

Wasikar gayyatar na dauke da sa hannun sakataren kwamitin kula da harkokin shari’a na majalisar Abdullahi Bature, wadda ta bukaci Muhuyi Magaji da ya bayyana gaban majalisar a gobe Laraba 14 ga watan Yuli da karfe 12 na rana.

Haka zalika wasikar ta bukaci Muhuyi Rimin Gado ya yi mata cikakken bayani kan kudaden da ya kwato daga shekarar 2015 zuwa lokacin da aka dakatar da shi.

Baya ga wannan, majalisar ta bukaci ya gabatar mata cikakkun bayanan hada-hadar kudaden da aka gudanar a hukumar, da suka hadar da gudunmawar da ta karba a hukumomi daban-daban tun daga shekarar 2015 zuwa yanzu.