Malami ya dakatar da daraktoci 12 a EFCC

Ofishin attorney janar na kasa kuma ministan shari’a ya dakatar da wasu daraktoci guda goma sha biyu a hukumar yaki da cin hanci da rashawa ta EFCC.

Rahotanni sun ce ofishin attorney janar na kasar ya turowa mai rikon mukamin shugabancin hukumar ta EFCC Muhammed Umar da wasikar dakatar da daraktocin ne a daren jiya Talata.

A cewar takardar dakatarwar hakan wani mataki ne da zai taimaka wajen gudanar da cikakken bincike kan ayyukansu a hukumar ta EFCC.

Ya zuwa yanzu dai dakataccen hukumar ta EFCC Ibrahim Magu ya shiga mako na biyu da gurfana a gaban kwamitin shugaban kasa da ke gudanar da bincike akansa game da zarginsa da laifuka da dama.