Muna yawan samun korafin jama’a kan kamfanonin sadarwa – NCC

Hukumar kula da kafofin sadarwa ta kasa (NCC), ta ce, cikin watanni goma sha biyar da suka gabata ta karbi korafi kan rashin ingancin manhajar da kamfanonin sadarwa na kasar nan ke bai wa abokan huldarsu, wanda ya kai dubu ashirin da shida da dari daya da sittin da tara.

A cewar hukumar ta NCC cikin wannan wa’adi dai ta samu nasarar warware dubu ashirin da biyar da dari biyar da saba’in da biyar na wadannan korafe-korafe.

Hakan na cikin wata sanarwar ce da hukumar ta fitar mai dauke da sa hannun daraktan yada labarai na hukumar ta NCC Ikechukwu Adinde.

Sanarwar ta ce, korafe-korafen hukumar ta karbesu ne tsakanin watan Janairun shekarar da ta gabata zuwa watan Afrilun bana.