Masarautar Katsina ta nada sabon hakimin karamar hukumar Kankara

Masarautar Katsina, ta sanar da sunan Alhaji Adamu Bello, a matsayin sabon hakimin Kankara, bayan sauke tsohon hakimin Alhaji Yusuf Lawal, da aka zarge shi da taimakawa masu garkuwa da mutane.

Hakan na kunshe a cikin takardar nadin sabon hakimin mai dauke da sa hannun sarkin Katsina Alhaji Abdulmumini Kabir Usman, mai dauke da kwanan watan 24 ga Mayu.

A cewar sakataren masarautar Sarkin Yakin Katsina, Alh. Bello Mamman-Ifo, ya tabbatar da cewar bayan kafa kwamitin bincike a samu tsohon hakimin da laifi na taimakawa ‘yan ta’adda tare da lalata yunkurin jami’an tsaro wajen samar da zaman lafiya da kare dukiyar jama’a a yankin nasa.

A baya dai masarautar ta Katsina ta sauke dagacin mai sarautar Sarkin Fauwan Katsina hakimin Kankara, bisa zargin sa da taimakwa ‘yan bindigar.