Masarautun Kano za su lakume naira miliyan 100 cikin kasafin kudin shekarar 2021

Gwamnatin jihar Kano ta ce masarautun Kano hudu za su lakume Naira milayan 100 cikin kasafin kudin bana domin kawata su.

Kazalika an ware miliyan dari biyu domin daga darajar asibitocin masarautun hudu da suka hadar da: Rano Karaye Bichi da kuma masarautar Gaya duk a cikin kasafin shekarar 2021.

Kwamishinan ma’aikatar kasafin kudi da tsare tsare na jihar Kano Nura Muhammad Dankadai ne ya sanar da hakan a wani taron manema labarai ga me da kasafin kudin shekarar 2021.

Nura Muhammad Dankadai ya kuma ce, cikin kasafin kudin an ware naira miliyan 64 don ginawa masu tallace-tallace akan titi, a wani yunkuri na kawo karshen wahalar da suke sha a yayin gudanar da sana’o’insu.