Matsin rayuwa: za mu tsunduma yajin aikin gama-gari – NLC da TUC

Gamayyar kungiyoyin ƙwadagon Najeriya NLC da TUC sun sanar da shirin su na tafiya yajin aikin gama-gari.

Cikin wata sanarwa da suka fitar NLC da TUC, sun baiwa gwamnatin tarayya wa’adin mako biyu da ta kawo ƙarshen matsalolin da ake fuskanta ko kuma su tsunduma yajin aiki a ƙasar.

Kungiyoyin sun sanar da cewa, sun bada wa’adin ne biyo bayan gaza cika alƙawarin da suka ƙulla da shugaban ƙasa Bola Ahmed Tinubu tun a ranar 2 ga watan Oktobar 2023, bayan cire tallafin mai fetur.

NLC da TUC sun yi zargin cewa, gwamnati na kokarin yin watsi da halin matsin da al’ummar ƙasar ke ciki a wanna lokaci, don haka ba za su zuba ido ba.