Mun ɗauki matakan samar da wadatatciyar wutar lantarki- Kashim Shettima

Mataimakin Shugaban Ƙasa, Kashim Shettima, ya tabbatar wa ‘yan Najeriya cewa Gwamnatin Tarayya na ƙara ɗaukar matakai domin samar da wadatatciyar wutar lantarki a faɗin Najeriya.

Kashim Shettima, ya bayyana hakan ne a jiya Alhamis yayin ƙaddamar da sabuwar hedikwatar Hukumar Kula da Bashin Wutar Lantarki ta Najeriya, wato Nigerian Electricity Liability Management Company, a birnin Abuja.

Ya kuma umarci hukumar da ta ƙara ƙaimi tare da taka rawar gani wajen warware matsalolin da ke addabar ɓangaren wutar lantarki, domin samun ingantaccen haske ga al’umma.

Mataimakin shugaban kasan, ya jaddada cewa gyare-gyaren da gwamnati ke aiwatarwa za su taimaka wajen ƙara samar da wuta tare da rage matsalolin da masu amfani da ita ke fuskanta.