Mun biya diyya ga iyalan tsoffin ma’aikatan mu da suka rasu – NDLEA

Hukumar yaƙi da sha da fataucin miyagun ƙwayoyi ta ƙasa NDLEA ta ce, ta biya diyyar sama da naira miliyan 163 da dubu dari hudu ga iyalan wadanda suka rasu a bakin aiki su 188.

Shugaban hukumar Birgediya janar Muhammad Buba Marwa mai ritaya ne ya bayyana hakan lokacin da yake miƙa chakin kudi ga wasu iyalai 14 na mamatan.

Ya ce, waɗanda suka samu kuɗaɗen sun rasa mazajen su ne tun a shekarar 2014, kuma tuni mafi yawa daga cikin iyalan, suka fara ganin kuɗin ta asusun su.

Buba Marwa ya yabawa shugaban ƙasa Muhammadu Buhari bisa goyon bayan da ya bai wa hukumar, na biyan diyya ga iyalan waɗanda suka rasa rayukan su a bakin aiki don rage musu raɗaɗi.