Mun kammala rarraba kayayyakin da basa bukatar tsaro – KANSIEC

Hukumar zabe mai zaman kanta ta jihar Kano KANSIEC, ta ce ta kammala rarraba kayayyakin da basa bukatar tsaro na zaben kananan hukumomin da za a gudanar a ranar Asabar 16 ga watan Janairun da muke ciki a kanana hukumomin 44 na jihar.

Shugaban hukumar Farfesa Garba Ibrahim Sheka ne ya bayyana hakan, jim kadan bayan kammala shirin Barka da Hantsi nan tashar Freedom rediyo da ya mayar da hankali shirye-shiryen da hukumar ke yi na gabatowar zaben shugabannin kananan hukumomi da mataimakansu.

Garba Sheka ya ce, tuni hukumar ta aike da kayayyakin da basa bukatar tsaro zuwa cibiyoyin zaben da ke kowacce karamar hukumar yayin da sauran kayayyakin za a kammala rabasu a ranar Laraba da Juma’ar jajiberan zaben.

Garba Ibrahim Sheka kenan, shugaban hukumar zaben kananan hukumomin KANSIEC cikin shirin Barka da Hantsi na yau, sai a biyo mu don jin cikakken rahoto kan yadda shirin ya kasance a labaranmu na gaba.