Mun samu gibin fiye da Naira biliyan biyar – NNPC

Kamfanin mai na kasa NNPC ya ce, a kokarinsa na kakkabe tallafin mai ya samu gibin Naira biliyan biyar da miliyan talatin da hudu a watan Yuni.

Hakan na cikin rahoton da kamfanin na NNPC ke fitarwa na wata-wata, game da hada-hadar da suka wakana.

Mai magana da yawun kamfanin na NNPC Kennie Obateru, ya shaidawa manema labarai cewa, gibin da aka samun yana cikin kudaden wucin gadi da aka bai wa dillalan mai ne wadanda suka shigo da mai tun lokacin ana ba da talafin mai.

Ya ce, za a ci gaba da biyan wannan kudi, har na tsawon watanni shida.