Muna kan-bakar-mu na fara yajin aiki a gobe – NLC

Gamayyar kungiyoyin kwadagon kasar nan na NLC da TUC sun sha alwashin fara yajin aikin da ta kuduri aniya a gobe litinin sakamakon karin farashin man fetur da wutar lantarki a kasar nan, duk da sanya bakin da majalisar wakilai ta yi a yau domin dakatar da shi.

Da safiyar yau ne dai shugaban majalisar wakilai Femi Gbajabiamila ya yi wata ganawar sirri ta kusan sa’a guda da shugaban kungiyar kwadago ta kasa NLC Kwamared Ayuba Wabba da takwaransa na TUC Quadri Olaleye.

Sauran mahalarta taron sun hadar da mataimakin shugaban masu rinjaye na majalisar Peter Akpatason da shugaban kwamitin Kwadago na majalisar Ali Muhammad.

Bayan kammala taron ne Ayuba Wabba ya shaidawa manema labarai cewa gwamnatin tarayya da kanta ta sabawa umarnin kotu wajen yin karin farashin wutar lantarkin.