Mutane 30 sun mutu cikin mako guda sanadiyyar cutar Corona a Lagos – Sanwo-Olu

Gwamnan jihar Lagos, Babajide Sanwo-Olu ya ce cutar Corona da ta sake dawowa karo na uku ta yi sanadiyyar mutuwar mutane 30 a cikin mako guda a jihar.

Sanwo-Olu ya bayyana hakan ne yayin da yake bada bayanai kan bullar cutar karo na uku samfurin Delta ga manema labarai a Lagos.

Ya ce, ana samun akalla mutuwar mutane shida a kowace rana cikin makon da ya gabata.

“Duk da haka bai kamata a mayar da hankali kan fargaba da firgici ba, amma ya kamata mu mayar da hankali tare da tsayayyiyar azama da jajircewa don sauya yanayin”, in ji shi.