‘Yan sanda sun cafke mai daukar nauyin tsagerun IPOB a jihar Imo

‘Yan sandan jihar Imo sun cafke wani mutum da ake zargi da daukar nauyin tsagerun dake fafutukar kafa ‘yantattar kasar Biafra, IPOB.

A wata sanarwa da mai Magana da yawun ‘yan sandan jihar, CSP Mike Abattam ya fitar, ya ce, ana zargin Boniface Okeke da bawa kungiyar tsagerun tallafin naira miliyan 10.

CSP Abattam ya ce, “Okeke ya tabbatar da cewa shi ne mai ba da taimako da kuma kuɗade na ayyukan IPOB a cikin jihar yayin da yake a kasar waje.”

Ya kuma ce, Okeke mai shekaru 57 ya taimakawa ‘yan sanda wajen kama mutane 26 daga cikin mambobin kungiyar tsagerun.