Mutane 9 sun rasu sakamakon faɗawar Mota cikin ruwa a garin Gwarzo

Hukumar kashe gobara ta Kano ta tabbatar da rasuwar mutane 9 a wani ibtila’in faɗawar Mota cikin ruwa.

Lamarin ya faru ne a daren Asabar, daidai Dam ɗin Fada da ke dab da shiga garin Gwarzo, inda motar ƙirar Golf ta kauce hanya ta faɗa ruwan.

Kakakin hukumar kashe gobara na Kano Saminu Yusuf Abdullahi ya ce, motar ta taso ne daga Kano zuwa Katsina.

Ya ce, hatsarin ya faru ne sakamakon fashewar tayar motar.

An ceto mutane 12, amma 9 daga ciki sun rasu a asibitin garin Gwarzo, yayin da 3 ke ci gaba da samun kulawa.

Ana kuma ci gaba da neman ceto mutum guda a ruwan.

Mutanen da ke cikin motar sun hada da manya mata da maza sai kuma kananan yara ƴan kimanin watanni 6.

Hukumar kashe gobarar ta Kano ta ce ta yi aikin ceton ne tare da tallafin Masuntan da ke yankin.