Na fara sayen Zinare don magance matsalar tsaro – Gwamnan Zamfara

Gwamnatin jihar Zamfara ta fara sayen ma’adanan zinare daga hannun masu haƙowa a jihar.
Gwamnan jihar Zamfara Muhammad Bello Matawalle ne ya bayyana hakan, inda ya ce hakan zai taimaka wajen magance matsalar tsaro a jihar.
Matawalle ya ce, Allah ya albarkaci jihar da ma’adanai da dama amma an barsu sasakai babu tsari, kuma gwamnatin jihar ba zata lamunci hakan ba.
Zai tabbatar al’ummar jihar sun amfana da albarkar da Allah ya yiwa jihar.
Gwamnan ya kuma koka cewa, wasu idan sun fita waje sun sayar da zinare suna dawowa jihar da makamai, lamarin da ke ta’azzara matsalar tsaron jihar.
Yanzu babu wani kamfani da zai kara sayen zinaren ya fita da shi, gwamnati zata rika saya ta ajiye shi ya zama mallakin al’ummar jihar Zamfara inji gwamnan.