NAHCON ta kayyade kudin Hajjin bana

Hukumar aikin hajji ta Nijeriya NAHCON ta bayyana kudin da maniyyata aikin hajjin bana zasu biya a hukumance.

Ta cikin wata takarda mai dauke da sa hannun mataimakiyar daraktar yada labaran hukumar Fatima Sanda Usara ta sanyawa hannu, ta ce “an sanya kudaden ne a matakai daban daban na shiyyoyin kasarnan”.

Inda mataki mafi kasa zasu biya naira miliyan 4 da dubu dari 6 da 79, yayinda mafi kololuwa zasu biya naira miliyan 4 da dubu dari 8 da 99.

Wannan dai na zama kari akan kudaden da a baya aka tsammaci hukumar zata sanya, wadda ta ce an samu karin ne sakamakon hauhawar farashin dalar da ake cigaba da fuskanta a kasarnan.