An kama wasu da ake zargi da yunƙurin tayar da rikici a yayin zaɓen cike gurbi

Rundunar ƴan sandan jihar Kano haɗin gwiwa da sauran jami’an tsaro sun tabbatar da kama wasu da ake zargi zasu shiga yankin ƙananan hukumomin ƙunchi Tsanyawa domin tayar da hargitsi a yayin zaɓen cike gurbi da yake wakana.

Kwamishinan yansandan jihar kano CP Muhammad Ussaini Gumel ne ya bayyana hakan yayin da yake yiwa manema labarai karin haske a yayin zagayen tabbatar da an gudanar da zaɓen cikin kwanciyar hankali.

Kwamishinan yace cikin wa’inda aka kama akwai Abdurrazak Muhammad da ake kira da Mai Salati mazaunin ƙaramar hukumar Birni ya tabbatarwa hukumar ƴan sandan cewa wani da yake takarar ɗan majalisar ne mai suna Gwarmai ne ya ɗauki nauyin su.

Haka kuma CP yace yanzu haka zasuje domin yin bincike ga wannan ɗan takarar domin tabbatar da lamarin.