NDLEA ta hada kai da Kwalejin Kano Polytechnic domin gyaran hali ga masu ta’ammali da miyagun kwayoyi

Hukumar yaƙi da sha da fataucin miyagun ƙwayoyi ta Najeriya, NDLEA, reshen jihar Kano, ta ce za ta haɗa gwiwa da Cibiyar Ci gaban Ƙwarewar Aiki ta Kwalejin fasaha wato Kano State Polytechnic wajen koyar da sana’o’i ga mutanen da aka yi wa gyaran halayya bayan shaye-shaye, da kuma waɗanda ke hannun hukumar.

Ta cikin wata sanarwa da ya aikewa manema labarai, mukaddashin jami’in hulda da jama’a na Kwalejin  Auwal Isma’il Bagwai  ta ce, ancimma matsayar ne yayin wata ganawa tsakanin jami’an NDLEA da shugabannin cibiyar a Kano State Polytechnic. 

Daraktan cibiyar, Comrade Abdullahi Ibrahim K/Nasarawa, ya yaba wa kwamandan NDLEA na Kano, CN Dahiru Yahaya Lawal, kan yadda yake ƙoƙarin ganin an rage matsalar shaye-shaye da fataucin miyagun ƙwayoyi a jihar.

A nasa ɓangaren, jami’in NDLEA mai kula da yaƙi da hana shaye-shaye, ACN Mu’awiya Alkali, wanda ya wakilci kwamandan jihar, ya ce shirin zai taimaka wajen bai wa waɗanda suka daina shaye-shaye damar dogaro da kansu da kuma samun halal ɗin sana’ar yi. Ya ce hakan zai rage yiwuwar komawar su cikin shaye-shaye ko fataucin miyagun ƙwayoyi.