NLC: Za muyi kokari wajen ganin ba a sake samun sa-in-sa ba tsakaninmu da gwamnati

Kungiyar Kwadago ta kasa NLC ta ce za ta ci gaba da bibiyar gwamnatin Jihar Kano domin ganin ta mayarwa ma’aikata kudin da ta zaftare musu na albashin watan Maris.

Shugaban kungiyar reshen jihar Kano Kwamared Kabiru Ado Minjibir ne ya bayyana hakan jim kadan bayan kammala shirin “Barka da Hantsi” na nan Freedom Radio.

Shirin dai ya mayar da hankali ne kan yadda kungiyar ta yi yunkurin tafiya yajin aiki sakamakon zaftarewa ma’aikata albashi da gwamnatin jihar Kano ta yi.

Kabiru Ado Minjibir ya kuma ce kungiyar za ta yi iya bakin kokarinta wajen ganin ba a sake samun wata sa-in-sa tsakaninta da gwamnati ba.

“Za mu dauki mataki kan wasu baragurbin jami’an gwamnati da ke dibarwa ma’aikata kudi da sunan ba shi,” a cewar Kwamared Minjibir.