Za mu dauki tsattsauran mataki kan masu rufe gidajen mai don tsawwala farashi a Kano – Muhyi

Hukumar karbar korafe-korafe da yaki da cin hanci da rashawa ta jihar Kano ta yi gargadin daukar tsattsauran mataki kan masu gidajen sayar da man fetur da ke tsawwalawa al’umma farashi.

Shugaban hukumar Barista Muhiyi Magaji Rimin Gado ne ya bayyana hakan yayin wani taron manema labarai, sakamakon yadda aka fara fuskantar karancin man a Jihar Kano, a dalilin rufewar da wasu gidajen man suka yi.

Ya kara da cewa hukumar za ta ci gaba da zagayawa cikin kasuwanni don binciko masu kara kudin kayan masarufi.

Muhuyi Magaji Rimin Gado ya kuma yi kira ga ‘yan kasuwar da su sausautawa jama’a a daidai wannan lokaci na fara ibadar watan azumin Ramadan.