NUJ Freedom Radio ta taya Wasila Ibrahim Ladan murnar samun nasara

Kungiyar ‘yan Jaridu ta kasa reshen tashar  Freedom Radio Kano, ta taya kwamrade Wasila Ibrahim Ladan murna, a matsayin sabuwar sakatariya ta Kungiyar ‘yan Jaridu mata ta kasa NAWOJ.

Wannan na cikin wata sanarwa mai dauke da sa hannun shugabar kungiyar kwamrade Aisha Muhammad Yalleman da Sakataren kungiyar Kwamrade Muzamil Ibrahim Yakasai.

Ta cikin sanarwa, Kwamrade Aisha ta ce, Kwamrade Ladan ta cancanci matsayin da ta samu na sakatariya, sakamakon kwazonta da hangen nisanta akan ‘yan Jaridu mata a fadin Najeriya.

Sanarwa ta kuma ta ya Hajiya Aisha Ibrahim Bura murna a matsayin sabuwar shugabar kungiyar NAWOJ.

Kwamrade Aisha Yalleman ta yi fatan Hajiya Bura za ta hada kan ‘yan jarida mata na kasar nan, da nufin ciyar da kungiyar gaba, tare da fatan cewa, kungiyar za ta ci gaba da bai wa ‘yan jaridun horo akai akai ganin yadda aikin jarida a yanzu ke tafiya da zamani.

An dai gudanar da zaben kungiyar ta NAWOJ a ranar Asabar, Ashirin da biyar ga watan Nuwanban nan da muke ciki, a birnin tarraya Abuja.