PDP ta musanta rahoton cewa hukumar EFCC ta tsare tsohon gwamnan Kano Rabi’u Musa Kwankwaso

Jam’iyyar PDP reshen jihar Kano ta musanta rahoton cewa hukumar yaƙi da rashawa ta EFCC ta tsare tsohon Gwamnan Kano Injiniya Rabi’u Musa Kwankwaso.

Wasu rahotanni dai sun ce, EFCC ta tsare Kwankwason ne bayan da yaƙi amsa gayyatar da ta yi masa.

Rahotannin sun ce EFCC ta gayyaci Kwankwason ne bisa zargin da ake masa na wadaƙa da kuɗin ƴan fansho ba bisa ƙa’ida ba.

To sai dai mai magana da yawun jami’iyyar PDP a jihar Kano Bashir Sanata ya ce, labarin ba shi da tushe balantana makama.