PDP taki amincewa da adadin da aka keɓe mata cikin shirin ɗaukar aiki 774

‘Yan majalisar wakilai na jam’iyyar PDP sun ki amincewa da karɓar adadin da aka ware musu na shirin gwamnatin tarayya wanda za’a ɗauki matasa  dubu 774 aiki a kasar nan.

Shugaban marasa rinjaye na majalisar wakilai Ndudi Elumelu daga jihar Delta ne ya bayyana haka yana mai cewa jam’iyyar PDP na neman da a sanya gaskiya cikin ɗaukar masu ayyukan.

Ndudi Elumelu ya ce kamata ya yi gwamnatin tarraya ta sake yin nazari kan matakan ɗaukar aikin da ta keɓewa jam’iyyar ta PDP.

Shugaban ƙasa Muhammad Buhari ya ƙirƙiro da shirin don samawa matasa ayyukan yi a kasar nan wanda za’a dauka a kananan hukumomin 774 na kasar nan wanda za a fara daga watan Okotoban wannan shekarar.