PHIMA ta bankado dakin shan magani da ake sayar da miyagun kwayoyi a Kano

Hukumar lura da cibiyoyin lafiya da asibitoci masu zaman kansu ta Kano PHIMA ta rufe wani dakin shan magani dake unguwar Rafin Dan Nana a yankin karamar hukumar Gwale.

Hukumar ta PHIMA ce ta sanar da hakan, cikin wata sanarwa mai dauke sa hannun daraktan sashen lura da harhada magunguna na hukumar Abdullahi Abubakar.

Sanarwar ta ce, hukumar ta samu rahotonnin sirri, kan yadda matasa ke zuwa dakin shan magani ba bisa ka’ida ba, wanda bincike ya gano cewar matasa na yawan zuwa wurin musamman a lokacin da dare yayi.

Hukumar ta ce, sakamakon binciken da tayi ya gano cewar ana sayar da miyagun kwayoyi, wanda hukumar ta samu nasarar kama katan-katan na miyagun kwayoyi a wurin.

Yanzu haka dai an cafke wadanda ke lura da wannan dakin shan magani baya ga garkame shi da hukumar tayi.