Rahoto : Al’umma su dage wajen yada ilimin addinin musulunci – Bin Usman

Limamin masallacin Juma’a na Sahaba dake unguwar Kundila cikin karamar hukumar Tarauni anan birnin Kano Sheikh Muhammad Bin Usman ya ja hankalin al’ummar musulmi wajen dagewa kan yada ilmin addinin musulunci a yankunan karkara.

Sheikh Muhammad Bin Usman ya bayyana hakan ne ta cikin Hudubar Sallar Juma’a da ya gabatar a masallacin kan darussan dake kunshe cikin kalandar musulunci.

Ya ce shakka babu akwai bukatar sadaukar da kai wajen dabbaka addinin musulunci da kuma koyi da darussan dake cikin kalandar Hijra.

Muhammad Bin Usman ya kara da cewa, ya zama wajibi a baiwa bangaren koyi da magabata na kwarai fifiko ba wai kawai tuna abin da suka yi ba.

Wakilin mu Umar Idris Shuaibu ya ruwaito Hudubar Sallar Juma’ar ta yau da limamin masallacin Sahaba dake Kundila ya gabatar, ta maida hankali kan muhimmancin watan Muharram dake zaman na farko a musulunci.