‘Yan bindiga sun kai hari a kauyuka 2 da ke Katsina

Rundunar ‘yan sandan jihar Katsina ta tabbatar da wani hari da aka kai kauyukan Kanawa da Runka a karamar hukumar Danmusa a jihar Katsina.

Mai magana da yawun rundunar SP Gambo Isah ne ya tabbatar da hakan, har ma ya ce, harin ramuwar gayya ce sakamakon yadda mazauna kauyen Kanawa suka kashe wani mutum mai suna Mani Doro.

Jaridar Daily Trust ta rawaito cewa mazauna yankin sun shaida cewa ‘yan bindigar sun kai hari kauyukan Kanawa da Runka tare da hallaka mutane shida a ranar Lahadin da ta gabata, lamarin da ya tarwatsa al’ummar yankunan.

Maharan sun shiga kauyukan akan ababen hawa sama da sittin, abinda ya haifar da jikkatar mutane da dama baya ga rasa rayukan mutane shida.