Rashin wutar lantarki na janyowa Najeriya asarar Naira tiriliyan 11 a duk shekara– Bankin duniya

Bankin duniya ya ce rashin isash-shen wutar lantarki ya janyowa bangaren masana’antu da harkokin kasuwanci a Najeriya, asarar makudan kudade dala biliyan 29 kwatankwacin naira tiriliyan goma sha daya.

A rahoton da bankin na duniya ya fitar a jiya laraba, rahoton ya ce, harkokin kasuwanci da sana’oi a Najeriya suna tabka muguwar asarar sama da naira tiriliyan goma sha daya a duk shekara.

Bankin na duniya ya kuma yi ikirarin cewa Najeriya ce kasa da ta fi yawan adadin jama’a da ba sa samun wutar lantarki a duniya.

Babban jami’in bankin da ke kula da yammaci da tsakiyar afurka, Ashish Khanna, ya ce, rashin wutar na matukar janyo koma baya ga harkokin tattalin arzikin Najeriya.