Rundunar yan sandan Kano na neman matasa 72 Ruwa a Jallo

Rundunar ‘yan Sandan jihar Kano, ta sanar da sunayen wasu mutane 72 da ta ke zarginsu da laifin bijirewa shirinta na samar da zaman lafiya ta hanyar ci gaba da daukar nauyin haddasa fadace-fadacen daba da rikicin Siyasa a wasu daga cikin kananan hukumomin jihar.

Mai magana da yawun rundunar SP Abdullahi Haruna Kiyawa, ne ya bayyana hakan ta cikin wata sanarwa da rundunar ta fitar ranar Lahadi.

Sanarwar ta kuma bayyana neman wadannan bijirarrun ‘yan daban da suka ki rungumar zaman lafiya Ruwa a Jallo.

SP Abdullahi Haruna Kiyawa ta cikin sanarwar ya kuma ce, daukar matakin ya biyo bayan yadda rundunar ta yi la’akari da irin yadda ake ci gaba da samun karuwar aikata laifuka a yanzu.