Sabuwar Shekarar Musulunci: Ganduje ya ayyana litinin a matsayin ranar hutu ga ma’aikata

Gwamnatin jihar Kano ta ayyana ranar Litinin 09 ga watan Agustan 2021 a matsayin ranar hutu ga ma’aikata don murnar shigowar sabuwar shekarar Musulunci

Gwamna Dakta Abdullahi Umar Ganduje ne ya ayyana Litinin din, da ke zaman 1 ga watan Muharram hijra 1443.

Gwamnan ya bayyana hakan ta cikin sanarwar da kwamishinan yada labarai Malam Muhammad Garba ya sanya wa hannu.

Sanarwar ta bayyana cewa, hutun wani bangare ne na tunawa da sabuwar kalandar Musulunci ta 1443, a don haka an bukaci ma’aikata da su yi amfani da ranar wajen gudanar da addu’o’in neman zaman lafiya a kasar nan.