Hutun sabuwar shekarar musulunci bai shafi masu rubuta jarrabawa ba – Ganduje

Gwamnatin jihar Kano ta ce hutun sabuwar shekarar musulunci da ta bayar bai shafi masu rubuta jarrabawar NECO da SSCE ba.

Ma’aikatar Ilimi ta jihar Kano ce ta fitar da sanarwar mai dauke da sa hannun kwamishinan ilimi Malam Muhammad Sanusi Kiru.

Sanarwar ta bukaci iyaye da daliban da suke rubuta jarrabawar NECO SSCE ta Shekarar 2021 cewa hutun da gwamnati ta bayar na ranar Litinin 9 ga watan Ogusta bai shafi harkar jarrabawar ta su ba.

Saboda haka ana umartar dukkanin daliban da suke rubuta jarrabawar da su tabbatar sun je cibiyoyin su domin ci gaba da rubuta jarrabawar.