Sarkin Kano na 14 a Daular Fulani Muhammadu Sanusi II ya zama Khalifan Tijjaniyya a Najeriya

Darikar Tijjaniyya ta nada Sarkin Kano na 14 a Daular Fulani Muhammadu Sanusi na biyu a matsayin Khalifan Tijjaniyya a Najeriya.

An gudanar da nadin ne a daren Juma’ar nan a Sokoto, kuma bikin nadin ya samu halartar manyan jiga-jigan darikar ta Tijjaniya a ciki da wajen Najeriya, da suka hada da Sheikh Dahiru Usman Bauchi da kuma gwamnan Jihar Sokoto Aminu Waziri Tambuwal.

Muhammadu Sanusi na biyu ya gaji kakansa Sarkin Kano Muhammadu Sanusi na daya, wanda shi ne Khalifan Tijjaniyya na farko a Najeriya.

Tun bayan rasuwar Khalifan Tijjaniya Sheikh Isyaka Rabi’u a shekarar 2018 ba nada sabon Khalifa ba sai yanzu.