Sarkin Kano ya umarci iyayen kasa su sanya ido kan bakin fuska yayin zabe

Mai Martaba Sarkin Kano Alhaji Aminu Ado Bayero ya umarci masu unguwanni da hakimai da har ma da dagatai da su kara sanya ido wajen shige da ficen bakin fuska lokacin zabe.

Sarkin ya bayar da umarnin ne a yau Juma’a, lokacin da yake jawabi ga manema labarai a fadar sa.

Alhaji Aminu Ado Bayero ya kuma bukaci al’ummar Kano da su fito su kada kuri’a a gobe kamar yadda doka ta tanada.

Haka kuma, Sarkin ya bukaci yan siyasa da su kauce wa sayen kuri’ar jama’a da kuma haifar da abinda zai janyo zubar da jini,.

Sarki Aminu Ado Bayero, ya kuma bukaci iyaye da su tsawatar wa yayansu kan su guje wa shiga hatsaniyar siyasa.

Haka Kuma Sarkin, ya yi kira ga limamai da su yi hudubarsu ta yau a kan zaman lafiya a tsakanin al’ummar Nijeriya.