Shirye-shirye sun yi nisa na sanya matasa cikin N-Power a hukumomi – Sadiya Umar

Gwamnatin tarayya ta ce shirye-shirye sun yi nisa wajen ganin an sanya matasan da suka ci gajiyar shirin nan na Npower cikin wasu tsare-tsare na hukumomin gwamnatin tarayya.

Ministar kula da harkokin jinkai dakile abkuwar ibtila’I da kuma ci gaban al’umma, Hajiya Sadiya Umar Faruk ce ta bayyana hakan ta cikin wata sanarwa mai dauke da sa hannun mai magana da yawunta, Nneka Anibeze.

Sanarwar ta kuma bukaci matasan da suka ci gajiyar shirin na NPOWER wadanda aka yayesu da su ci gaba da hakuri domin gwamnati tana iya kokarinta wajen ganin an samar musu mafita.

A cewar sanarwar dai ma’aikatar ta kuma bukaci dukkan nin manyan jami’an da ke kula da shirin na NPOWER A matakan jihohi da su mika da sunayen matasan da su kaci gajiyar shirin a jihohinsu.