Shugaba Buhari ya isa Legas domin kaddamar da matatar Dangote

Shugaban kasa Muhammadu Buhari ya isa Birnin Legas domin kaddamar da sabuwar matatar man ta Dangote da aka gina a jihar, wadda ake sa ran za ta rika tace gangar mai dubu dari shida da hamsin a kowacce rana domin rage wahalar shigar da tataccen man Fetur a Nijeriya.

Ana saran wannan matata ta rika aikin tace man Fetur da man Dizal da Kalanzir da kuma man Jiragen sama.

Ana sa ran wannan matata za ta rage matsalolin da ake fuskanta a Nijeriya na rashin samun wadataccen man da ake tacewa a cikin gida.

Rahotonni sun bayyana cewa a makonni masu zuwa ake saran kamfanin ya fara aiki gadan-gadan a matatar wadda ita ce mafi girma da wani dan kasuwa ya mallaka a nahiyar Afrika.