Shugaba Buhari ya nemi hadin kan takwaroin sa kan dawo da kudaden da aka sace

Shugaban kasa Muhammadu Buhari da takwarorin sa na kasashen Zambia da Ethiopia sun bukaci hadin kan Shugabannin Afirka wajen bukatar dawowa da nahiyar biliyoyin kudaden da aka sace aka boye a wasu sassa na duniya.

Shugaba Buhari da sauran takwarorin sa, na Afirka sun yi wannan jawabi ne a gefen taron majalisar dinkin duniya da ke gudana a birnin New York na kasar Amurka.

Rahotanni sun ce ana zargin cewa duk shekara ana hada-hadar kudaden haramun da suka kai sama da dala biliyan hamsin a nahiyar afirka.

Da ya ke gabatar da jawabi shugaba Buhari, ya ce, Najeriya ta yi asarar sama da dala biliyan dari da hamsin da bakwai tsakanin shekarar dubu biyu da uku zuwa dubu biyu da goma sha biyu.