Shugaba Tinubu ya yi Allah-wadai da kisan gillar Filato

Shugaban kasa Bola Ahmad Tinubu, ya yi Allah-wadai da kisan gillar da aka yi wa mutane da dama a Kauyen Barikin Ladi da ke jihar Filato tare da bayar da umarnin gaggawa ga hukumomin tsaro dasu kamo wadanda ake zargi da laifin.

Hakan na kunshe ne ta cikin wata sanarwa da mataimaki na musamman ga shugaban kasan kan harkokin yada labarai Ajuri Ngelale ya fitar a Talatar makon nan.

Ta cikin sanarwar, Bola Tinubu ya kuma bar da umarnin kai wa al’ummar yankin kayan Agajin gaggawa musamman ga wadanda lamarin ya rutsa da su kwance a asibitoci.

Haka kuma Bola Ahmad Tinubu ya mika sakon ta’aziyyarsa ga gwamnatin jihar ta Filato tare da shan alwashin cewa wadanda suka aikata wannan laifi ba za su kubuta ba, har sai sun fuskanci hukunci akan abunda suka aikata.