Super Eagles za ta fafata da Côte d’Ivoire da Tunisia

Kungiyar kwallon kafa ta kasa Super Eagles za ta kara da kasar Côte d’Ivoire da kuma Tunisia a wasannin sada zumunta na kasa-da-kasa a watan Oktoba mai zuwa.

Najeriya dai za ta fafata da kasar Côte d’Ivoire a ranar 9 ga watan na Oktoba, kafin daga baya su hadu da kasar Tunisia bayan kwanaki 4.

Shugaban hukumar NFF, Amaju Pinnick, ya ce, za’a gudanar da wasannin guda biyu ne a kasar Austria.

Shugaban, ya ce, “Hukumar ta ci gaba da tattaunawa wajen ganin an samu damar wasannin sada zumunta, tsakanin Najeriya da wasu kasashen, sai kuma gashi an samu damar yin wasan sada zumunta har guda biyu, duk da cewa muna jiran gwamnatin tarayya ta bayyana ranar da za’a dawo a ci gaba da wasanni a fadin kasar nan”.