Tallafi: An fara tantance masu bukata ta musamman don basu kulawar lafiya kyauta a Kano

Hukumar taimakekeniyar lafiya ta jihar Kano ta fara yiwa masu bukata ta musamman rijistar tallafin lafiya kyauta, a wani mataki na inganta rayuwarsu da ta yaransu.

Shugabar hukumar Dakta Halima Muhammad Mijinyawa ce ta kaddamar da shirin a Litinin din nan.

Ta ce shirin wani yunkuri ne da zai takaitawa masu bukata ta musamman wahalhalun neman lafiya da kuma sayan magunguna.

A cewarta gwamnatin jihar kano zata ci gaba da bai wa masu bukata ta musamman tallafin lafiya tare da daidaita su da suran mutanen da suke gudanar da rayuwarsu kamar takwarorinsu na duniya.