Tinubu ya gana da wasu jiga-jigan jam’iyyar PDP

Shugaban kasa Bola Ahmed Tinubu ya yi wata ganawa da wasu jiga-jigan jam’iyyar PDP, wanda da ake kallon ta a matsayin yunkurin kulla sabon hadin kan siyasa kafin babban zaben shekarar 2027.

Ganawar ta gudana ne a Fadar Shugaban kasa da ke Aso Rock, inda Ministan Abuja, Nyesom Wike ya jagoranci jiga-jigan zuwa wajen shugaban.

Wannan ganawa ta kunshi abokan siyasa na kusa da Wike musamman mambobin tsohuwar kungiyar gwamnonin G5, wato wadanda suka yi adawa da takarar Atiku Abubakar a zaben 2023.

Wadanda suka halarci ganawar sun hada Ayodele Fayose tsohon gwamnan Jihar Ekiti da Samuel Ortom tsohon Gwamnan Jihar Benue da kuma Okezie Ikpeazu tsohon gwamnan Jihar Abia.