Tinubu ya nada sabon shugaban EFCC

Shugaban Nigeria Bola Ahmad Tinubu ya nada Mista Ola Olukoyede a matsayin shugaban hukumar yaki da masu yi wa tattalin arzikin kasa zagon kasa ta EFCC.

Mataimaki na musamman kan harkokin yada labarai da wayar da kai na shugaban kasar, Ajuri Ngelale ne ya bayyana hakan a wata sanarwa daya fitar a ranar Alhamis.

Nadin Olukoyede ya biyo bayan murabus din Shugaban Hukumar, Abdulrasheed Bawa bayan dakatar da shi da akayi.

Tinubu ya kuma amince da nadin Muhammad Hassan Hammajoda a matsayin sakataren hukumar yaki da cin hanci da rashawa na tsawon shekaru biyar, kafin majalisar dattawa ta tabbatar da su.

Shugaba Tinubu ya bukaci sabbin shugabannin Hukumar da su tabbatar da sun yi aiki tukuru, don tabbatar da dakile cin hanci da rashawa a Kasar.