Tsaro: Majalisar wakilai ta bukaci Buhari ya ayyana dokar tabaci a Najeriya

Majalisar wakilai ta bukaci shugaban kasa Muhammadu Buhari da ya gaggauta ayyana dokar tabaci kan harkokin tsaro a kasar nan.

Wannan na zuwa ne biyo bayan muhawarar awanni uku da ‘ya’yan majalisar su ka yi, wanda ya hada da bukatar daukar sabbin sojoji da ‘yan sanda aiki.

A bangare guda majalisar ta kuma gayyaci mai bai wa shugaban kasa shawara kan harkokin tsaro manjo janar Babagana Monguno mai ritaya da manyan hafsoshin tsaro da kuma shugaban hukumar kula da taurarun sararin samaniyar Najeriya da su gurfana gaban majalisar don karin haske kan matsalolin rashin tsaro da ke kasar nan.