Tsaro – Sojojin Najeriya sun hallaka yan ta’adda uku

Sojojin Najeriya da ke aiki a garin Sabon Birni da ke kan iyaka da jihar Sakkwato sun kashe wasu ‘yan bindiga uku tare da kwato makamai.

Samamen ya biyo bayan samun sahihan bayanan cewa ‘yan bindiga suna jigilar makamai a kafa daga Jamhuriyar Nijar zuwa Najeriya.

A cewar Daraktan hulda da jama’a na rundunar, Birgediya Janar Mohammed Yerima, Sojojin da ke yankin sun yi kwanton bauna a kan hanyar wani kauye tare da kashe maharan guda 3.

A cewar sa kayayyakin da aka kwato sun hada da bama-bamai da babura da kuma bindiga kirar AK47 da kayan adon kunne da kuma alburusai daban-daban.

Sai dai tuni Babban Hafsan sojin Najeriya Manjo Janar Faruk Yahaya ya yabawa kokarin da sojojin suka yi sannan ya bukace su da su ci gaba da aiki ta hanyar mamaye dukkanin haramtattun hanyoyi da ke kan iyakokin Jamhuriyar Nijar don dakile ayyakan bata gari.