Tsawa ta faɗo kan matasa da ke selfie tare da hallaka mutane 38

Rahotanni daga kasar Indiya sun ce tsawa ta faɗo kan wasu jama’a wadda ta yi sanadiyar mutuwar mutane talatin da takwas a wasu jihohi biyu da ke ƙasar cikin awanni ashirin da huɗu da suka gabata.

Aƙalla mutane goma sha ɗaya sun rasa rayukansu a jihar Rajashtan da ke yammacin ƙasar bayan da tsawar ta faɗo musu aka.

Babban jami’in ƴan sandan yankin, Ananda Srivastava, ya ce, mafi yawa na waɗanda suka mutun suna tsaka da ɗaukar hotunan selfie ne lokacin da tsawar ta faɗo musu aka.

Ya kuma ce wasu mutane tara sun rasa rayukansu lokacin da wata tsawar ta daban ta faɗo musu, kusa da inda ta farkon ta faɗo sannan mutane ashirin sun jikkata.

A jihar Uttar Pradesh kuwa mutane goma sha takwas sun rasa rayukansu bayan da tsawar ta faɗo musu.