Tsohon gwamnan Kaduna ya sauya sheƙa

Tsohon gwamnan jihar Kaduna Mukhtar Ramalan Yero, ya sauya sheƙa zuwa jam’iyyar APC mai mulki.

Ramalan Yero ya sanar da ficewar tasa ne a wani bayani da ya yi wa manema labarai yau Litinin a garin Kaduna.

Tsohon gwamnan ya ce ya koma APC ne bisa dalilan ƙashin kansa bayan ya tattauna da makusantansa a harkar siyasa.

Idan za a iya tunawa dai, tun a watan Oktoban bara ne Mukhtar Ramalan Yero, ya bayyana ficewarsa daga jam’iyyar PDP.

Mukhtar Ramalan Yero, ya yi gwamnan jihar ta Kaduna a ƙarƙashin jam’iyyar PDP daga shekara ta 2012 zuwa 2015 bayan rasuwar tsohon gwamnan jihar Patrick Yakowa a hatsarin jirgin helikwafta.

Bayan nan ne kuma ya yi takarar gwamnan jihar a jam’iyyar PDP sai dai bai samu nasara ba, inda daga bisani ya yi ta yin takarar gwamnan jihar, sai dai bai samu nasarar.