Twitter: Gwamnatin Najeriya ba ta kyauta ba – inji cibiyar CITAD

Cibiyar (CITAD) dake bunkasa fasahar sadarwa da ci gaban al’umma, ta yi kira ga majalisun dokokin tarayya da su dauki matakin gaggawa bisa umarnin gwamnatin tarayya na toshe kafar sada zumunta ta twitter.

Shugaban cibiyar Malam Yunusa Zakari Ya’u, shine ya yi wannan kiran a wani taron manema labarai da cibiyar ta gudanar a ranar asabar a Kano.

Malam Yunusa Zakari, ya ce, gwamnatin tarayya ba ta kyauta ba da ta dauki matakin toshe twitter, kuma wannan mataki ba zai ragi kamfanin twitter ba illa raba ‘yan Nigeria da ayyukan su.

Cibiyar ta kara da cewa, hana yin amfani da wata kafa ya sabawa kundin tsarin mulkin kasa.