Wani hatsarin mota ya jikkata mutane 20 wasu da dama sun mutu a ƙaramar hukumar Kura

Ana fargabar mutuwar mutane da dama yayin da 20 suka jikkata, a wani hatsarin mota da ya afku a garin Imawa da ke ƙaramar hukumar Kura anan Kano.

Haɗarin dai ya afkune bayan da wata mota kirar Golf ta yi ƙoƙarin wuce wasu manyan motocin dakon kaya, lamarin da ya sanya direban motar ya gaza cin birki.

Wannan ne ya sanya motocin suka yi taho mugama a ƙoƙarin da suka yi na kaucewa mai ƙaramar motar, nan ta ke motocin guda 3 suka kama da wuta.

Shaidun gani da ido sun tabbatar da cewa mai ƙaramar motar ne ke gudun wuce sa’a kuma shi ne musamabbabin faruwar lamarin.

Ko da Freedom Radio ta tuntuɓoi hukumar kashe gobara ta jihar Kano, mai magana da yawun ta Saminu Yusif ya tabbatar da afkuwar lamarin.

Sai dai ya ce, tuni jami’an su suka isa wajen da lamarin ya faru, kuma da zarar sun dawo za su yi ƙarin bayani.