Wata Sabuwa: Kamfanin NNPC ya musanta karin farashin mai

Kamfanin mai na kasa (NNPC) ya musanta batun karin farashin litar man fetur da hukumar kayyade farashin mai ta kasa (PPPRA) ta sanar a daren alhamis.

A cikin wani sako da kamfanin na NNPC ya fitar a shafinsa na twitter a yau juma’a, kamfanin NNPC ya ce har yanzu farashin mai ya na nan kamar yadda ya ke a baya.

Sakon na NNPC ya jaddada cewa ba za ayi karin farashin mai a watan Maris ba.

Wannan sako na NNPC ya sha bamban da sanarwar da tun farko hukumar kayyade farashin mai ta kasa (PPPRA) ta fitar.

Tun farko dai hukumar kayyade farashin mai ta kasa (PPPRA) ta sanar da cewa yanzu farashin mai ya kai naira dari biyu da goma sha biyu da kwabo sittin da daya.