Ya kamata masu rike da masarautun gargajiya su sanya ido a unguwanninsu: Sarkin gaya

Mai martaba Sarkin Gaya, a Jihar Kano, Alhaji Dakta Aliyu Ibrahim ya ja kunnen Hakimai da Dagatai da masu unguwanni na masarautar da su kara sanya idanu ga duk wata bakuwar fuska da ke kai komo a yankunansu.

Sarkin ya bayyana hakan ne ta cikin wata sanarwa da jami’in yada labaran masarautar Auwal Musa Yola ya fitar.

Ta cikin sanarwar Sarkin da ya samu wakilcin wazirin Gaya, Alhaji Usman Alhaji, ya jaddada bukatar dake akwai ga Hakimai da Dagatai da kuma masu Unguwanni kan su kara zage damtse wajen ganin ganin an dakile ayyukan bata gari da kuma rashin tsaro a yankin baki daya.