‘Yan kasuwa sun nemi El-rufa’i ya bude kasuwanni

‘Yan kasuwa a jihar Kaduna sun roki gwamnan jihar Malam Nasir El-rufa’i kan ya bude musu kasuwannin jihar domin ci gaba da kasuwanci.

Shugaban kungiyar ‘yan kasuwa na jihar Kaduna Alhaji Shehu Ibrahim Daudawa ne ya bayyana hakan a zantawar sa da wakilin Freedom Radio Abdullahi Ibrahim Gambo.

Daudawa ya ce, yanzu haka sun yi zama na musamman da hukumar raya kasuwanni ta jihar Kaduna domin ganin an samu matsaya ta yadda gwamnati zata amince su ci gaba da bude dukkanin kasuwannin jihar duba mawuyacin halin da ‘yan kasuwa suka shiga sanadiyyar rufe kasuwannin.

A ranar Laraba 10, ga watan Yunin da ya gabata ne, gwamna El-rufa’i ya sassauta dokar kulle a jihar, sai dai bai amince da ci gaba da bude kasuwanni ba, wanda ya zamowa ‘yan kasuwar tamkar ta leko ta koma.